ரஷ்ய  நிறுவனங்களுடனான பரிவர்த்தனைகளை நிறுத்தியுள்ளதாக பாரத ஸ்டேட் வங்கி தெரிவித்துள்ளது.

உக்ரைன் மீது ரஷ்யா தொடுத்துள்ள போர் இன்னும் நீடித்து வருகிறது. இதற்கு எதிர்ப்பு தெரிவித்துள்ள உலக நாடுகள் ரஷ்யா மீது பொருளாதாரத் தடைகளை விதித்துள்ளன. 

இந்நிலையில், நாட்டின் மிகப்பெரிய வங்கியான பாரத ஸ்டேட் வங்கி, ரஷ்ய நிறுவனங்களின் பரிவர்த்தனைகளை நிறுத்தியுள்ளது என்று வங்கி வெளியிட்டுள்ள சுற்றறிக்கையில் தெரிவித்துள்ளது.. 

இதன் காரணமாக அமெரிக்க, ஐரோப்பிய ஒன்றியம் , ஐக்கிய நாடுகளின் தடைகள் பட்டியலில் இருக்கும்  நிறுவனங்கள், வங்கிகள், துறைமுகங்கள் அல்லது கப்பல்கள் சம்பந்தப்பட்ட எந்த பரிவர்த்தனைகளும் செயல்படாது என்று விஷயமறிந்தவர்கள் தெரிவித்தனர்.

இந்தியாவிற்கும் ரஷ்யாவிற்கும் இடையிலான இருதரப்பு வர்த்தகம் இந்த நிதியாண்டில் இதுவரை 9.4 பில்லியன் அமெரிக்க டாலராக இருந்தது. 2020-21ல் 8.1 பில்லியன் அமெரிக்க டாலராக இருந்தது..

பெரும்பாலும் அரசு-அரசாங்க ஒப்பந்தத்தின் கீழ் இந்தியாவிற்கு பாதுகாப்பு பொருட்கள் மற்றும் உபகரணங்களை வழங்கும் மிகப்பெரிய சப்ளையர்களில் ரஷ்யாவும் ஒன்றாகும்.

கடந்த வாரம், G-7 நாடுகள் முக்கிய பொருளாதாரங்களின் குழு ரஷ்ய மத்திய வங்கிக்கு எதிராக தண்டனைத் தடைகளை விதித்தது. அவர்கள் ரஷ்ய வங்கிகளை SWIFT இன்டர்-பேங்கிங் அமைப்பில் இருந்து நீக்கவும் முடிவு செய்தனர். இது ரஷ்யாவை உலகளாவிய வர்த்தகத்தில் இருந்து தனிமைப்படுத்தும் நோக்கம் கொண்டது என்று தகவல்கள் தெரிவிக்கின்றன.